Ungt fólk til athafna - fyrir unga fólkið og framtíðina!

Með átakinu Ungt fólk til athafna sem nýlega var ýtt úr vör af félags- og tryggingamálaráðuneytinu er markmiðið að aldrei skuli líða meira en þrír mánuðir frá því að einstaklingur á aldrinum 18 - 24 ára verður atvinnulaus þar til honum er boðið starf, námstækifæri, starfsþjálfun eða þáttaka í öðrum verðugum verkefnum. Nánar um átakið.

Erlendar rannsóknir hafa sýnt að ungt fólk er sérstaklega viðkvæmt fyrir afleiðingum langtímaatvinnuleysis og þykir sýnt að afleiðingar þess að hefja starfsferilinn í atvinnuleysi geti haft áhrif starfsævina á enda. Með átakinu er verið að gefa ungum atvinnuleitendum möguleika á að koma sér af stað í námi, öðlast starfsréttindi eða kynnast nýjum starfsvettvangi, sér að kostnaðarlausu.

Vinnumálastofnun sér um framkvæmd átaksins og er það í höndum þjónustuskrifstofa Vinnumálastofnunar á landsbyggðinni en í Reykjavík hefur opnað ný þjónustuskrifstofa á Suðurlandsbraut 22.

---

Ferlið 

Á þjónustuskrifstofuna í Reykjavík koma daglega um 80 ungmenni á kynningarfund og fá leiðsögn og ráðgjöf um þá fjölbreyttu möguleika sem þeim stendur nú til boða. Að loknum kynningarfundi skrá atvinnuleitendur sig í það úrræði sem þeim lýst best á. Í þessu átaki er ekkert val um óvirkni, ef einstaklingar skrá sig ekki í úrræði veldur það bótamissi. Með þáttöku í úrræðnum halda einstaklingarnir bótunum og verða um leið virkir þáttakendur í samfélaginu. Sjá nánar.

---

Úrræðin og samstarfsaðilar

Fjölmörg úrræði standa til boða og ættu því allir að finna sér eitthvað við sitt hæfi. Má meðal annars nefna að nýlega hófu 40 ungmenni nám í Fjölbrautarskólanum í Breiðholti þar sem ásóknin er mest í listnám og iðngreinar. Sex hópar hafa tekið þátt í vinsælu sjálfseflingarnámskeiði í Hinu húsinu sem gengur undir nafninu Vítamín. Þá er mikil ásókn í ferðaþjónustunám hjá Mími - símenntun og Grunnmenntaskólinn er sömuleiðis vinsæll og námsleiðin Aftur í nám fyrir lesblinda. Um áttatíu ungmenni eru þáttakendur á vinnuvélanámskeiði og 25 - 30 ungmenni hefja nám á næstu dögum í MK í hótel- þjónustu og barþjónanámi. Mikill áhugi er líka á sjálfsboðaliðastörfum hjá Rauða krossi Íslands og Íþrótta- og ólympíusambandi Íslands.

---

 

---

 

---