Markmið ráðningarstyrks er að aðstoða atvinnurekendur við að fjölga tækifærum á vinnumarkaði fyrir atvinnuleitendur á skrá hjá Vinnumálastofnun. Með fjárstyrk úr Atvinnuleysistryggingasjóði er atvinnurekendum gert auðveldara fyrir að ráða nýtt starfsfólk um leið og atvinnuleitendur fá tækifæri til komast aftur út á vinnumarkað. Hámarkslengd samnings er 6 mánuðir.

Atvinnurekandi þarf að uppfylla eftirtalin skilyrði:

• Ráðningarstyrkur þarf að fela í sér aukningu á starfsmannafjölda hlutaðeigandi fyrirtækis eða stofnunar, starfsmaður er ráðinn sem launamaður. 
  
• Sækja þarf um ráðningarstyrk og skrá starf áður en starfsmaður hefur störf. 
• A.m.k. einn starfsmaður verður að vera á launaskrá í hlutaðeigandi fyrirtæki/stofnun áður en sótt er um ráðningarstyrk. 
• Hlutaðeigandi fyrirtæki/stofnun má ekki hafa sagt upp starfsfólki síðustu sex mánuði sem gegnt hefur sama starfi og fyrirhugað er að ráða í. 
• Viðkomandi atvinnuleitandi má ekki hafa sinnt sama starfi hjá hlutaðeigandi fyrirtæki, stofnun eða félagasamtökum á sl. 12 mánuðum. 
• Fyrirtæki/stofnun sé í skilum hvað varðar launatengd gjöld og opinber gjöld, svo sem iðgjöld og mótframlag í lífeyrissjóð, stéttarfélagsgjöld og tryggingagjald. 

Atvinnuleitandi þarf að uppfylla eftirtalin skilyrði:

• Teljast tryggður samkvæmt lögum um atvinnuleysistryggingar og fá greiddar atvinnuleysisbætur þegar þátttaka í úrræði hefst. Hafa verið í virkri atvinnuleit og skráður án atvinnu hjá Vinnumálastofnun í a.m.k. þrjá mánuði eftir atvinnumissi. 

Atvinnurekandi sækir um ráðningarstyrk og skráir starf á Mínum síðum atvinnurekenda. Sjá nánari leiðbeiningar um hvernig starf er skráð með því að smella hér. 

Ráðning og samningstímabil:  

• Sækja þarf um ráðningarstyrk og skrá starf áður en starfsmaður hefur störf. 
• Skila þarf inn afriti af undirrituðum ráðningarsamningi milli atvinnurekanda og starfsmanns sem uppfyllir ákvæði viðeigandi kjarasamninga. 
• Hámarkslengd samnings er 6 mánuðir nema í þeim tilfellum þar sem atvinnuleitandi er með skerta starfsgetu. Í samráði við ráðgjafa Vinnumálastofnunar er hægt að endurskoða lengd samnings. 
• Almennt er gert ráð fyrir 100% starfshlutfalli þegar um ráðningarstyrk er að ræða. 
• Samningur um ráðningarstyrk og greiðslur vegna hans falla úr gildi ef viðkomandi atvinnuleitandi hættir störfum hjá atvinnurekanda af  
  einhverjum orsökum á gildistíma samningsins. 
• Tímabil ráðningarstyrks hjá atvinnuleitanda telst ekki til ávinnslutímabils atvinnuleysisbóta. 
• Atvinnuleitandi er afskráður af atvinnuleysisskrá á meðan á ráðningartímabili stendur.

Greiðsla til fyrirtækis tekur mið af því hvað atvinnuleitandi hefur verið lengi á skrá.  

• Ef atvinnuleitandi hefur verið í 3 – 6 mánuði á skrá fær atvinnurekandi 50% grunnatvinnuleysisbóta ásamt 11,5% mótframlagi í lífeyrissjóð í styrk.
• Ef atvinnuleitandi hefur verið 6 mánuði eða lengur á skrá fær atvinnurekandi 100% grunnatvinnuleysisbóta ásamt 11,5% mótframlagi í lífeyrissjóð í styrk.

Dæmi: 

Atvinnuleitandi sem hefur verið 4 mánuði á skrá:  

Upphæð mánaðarlegs fjárstyrks: kr. 195.042 .- miðað við 100% starf.  

Atvinnuleitandi sem hefur verið 7 mánuði á skrá:  

Upphæð mánaðarlegs fjárstyrks: kr. 390.084 - miðað við 100% starf. 

Greiðslur er hægt að innheimta mánaðarlega eða í einu lagi í lok tímabils. Atvinnurekandi sækir um greiðslu styrks inni á Mínum síðum atvinnurekanda. Skilyrði fyrir greiðslu frá Vinnumálastofnun er að búið sé að greiða laun og standa skil á launatengdum gjöldum til Skattsins. Með hverri umsókn þarf að fylgja launaseðill fyrir viðkomandi mánuð sem sótt er um.

Nánari leiðbeiningar má finna hér

Sérstök átaksverkefni:

Þegar atvinnuleysi á landsvísu eða á einstöku landsvæði fer yfir 6% breytast viðmið um greiðslur vegna ráðningastyrkja.

Ef atvinnuleitandi hefur verið 1 mánuð eða lengur á atvinnuleysisskrá fær atvinnurekandi 100% grunnatvinnleysisbóta ásamt 11,5% mótframlagi í lífeyrissjóð í styrk.

Atvinnurekandi sækir um greiðslu styrks inni á Mínum síðum atvinnurekanda.
Skilyrði fyrir greiðslu frá VMST er að búið sé að greiða laun og standa skil á launatengdum gjöldum til Skattsins. Með hverri umsókn þarf að fylgja launaseðill fyrir viðkomandi mánuð sem sótt er um.