Fréttir

Ekki verður boðið upp á þátttöku í Frumkvæði í sumar vegna sumarfría en við munum taka upp þráðinn í haust. Umsóknir sem berast fyrir 15 ágúst verða því afgreiddar í byrjun september.

Atvinnuleysi lækkaði mikið í maí og fór úr 17,8% í apríl í 13,0% í maí. Munar þar mest um að atvinnuleysi sem tengist hlutabótaleiðinni lækkaði úr 10,3% í 5,6%. Almenna atvinnuleysið lækkaði einnig lítið eitt, úr 7,5% í 7,4%. Gert er ráð fyrir að atvinnuleysi lækki enn í júní og fari þá í 11,2%.

Alls bárust 23 tilkynningar um hópuppsagnir Vinnumálastofnun í maí þar sem 1.323 starfsmönnum var sagt upp störfum. Bætist það ofan á hópuppsagnir mars- og aprílmánaðar þar sem yfir 80 fyrirtæki sögðu upp nærri 5.900 manns.

Um birtingu á lista yfir fyrirtæki í hlutabótaleið.

Styrkjum til atvinnumála kvenna var úthlutað þann 11.maí síðastliðinn og fengu 36 verkefni styrki samtals að fjárhæð 37.180.000 kr. Formleg athöfn var ekki að þessu sinni í tengslum við úthlutun styrkjanna vegna aðstæðna í þjóðfélaginu.

Ef þú ert á atvinnuleysisbótum  samhliða minnkuðu starfshlutfalli í maí þarftu  að staðfesta það inni á mínum síðum milli 20. - 25. maí. 

Vinnumálastofnun stýrir  átakinu  varðandi sumarstörf námsmanna sem efnt er til í samvinnu við stofnanir ríkisins og sveitarfélög. Sveitarfélögin auglýsa þessi störf á sínum heimasíðum en störf  hjá hinu opinbera verða auglýst  og opnað fyrir  umsóknir  þann 26. maí nk.  á heimasíðu Vinnumálastofnunar. Ráðningartímabil eru tveir mánuðir. Þessi störf eru ætluð námsmönnum sem eru á milli anna og eru 18 ára á árinu og eldri. 

Atvinnuleysi jókst mjög mikið í aprílmánuði þegar flestir þeirra sem skráðu sig í minnkað starfshlutfall í kjölfar covid faraldursins, eða 33.637 manns alls, komu af fullum þunga inn í atvinnuleysistölur. Heildaratvinnu­leysi fór í 17,8% samanlagt, þ.e. 7,5% atvinnuleysi í almenna bótakerfinu og 10,3% vegna minnkaða starfs­hlutfallsins. Atvinnuleysið í almenna kerfinu jókst úr 5,7% í 7,5% og vegna minnkaða starfshlutfallsins úr 3,5% í 10,3%.

Að gefnu tilefni telur Vinnumálastofnun rétt að koma því á framfæri að hún telur sig hvorki hafa heimild til að afhenda né birta lista yfir þau fyrirtæki sem gert hafa samkomulag við starfsmenn sína um minnkað starfshlutfall.

Alls bárust 57 tilkynningar um hópuppsagnir Vinnumálastofnun í apríl þar sem 4.654 starfsmönnum var sagt upp störfum. Bætist það ofan á hópuppsagnir marsmánaðar þar sem 29 fyrirtæki sögðu upp 1.207 manns.

Aldrei hafa verið fleiri í þjónustu Vinnumálastofnunar en nú, en rúmlega 50.000 einstaklingar munu fá greiddar atvinnuleysistryggingar að fullu eða að hluta á móti skertu starfshlutfalli um þessar mundir. Þessi mikla aukning á fjölda í greiðsluþjónustu hefur átt sér stað á mjög skömmum tíma og leggur starfsfólk Vinnumálastofnunar allt kapp á að afgreiða umsóknir og koma þeim í greiðsluferli.