Fréttir 2022

Þann 1. janúar nk. taka gildi lög um sorgarleyfi, nr. 77/2022. Markmið laganna er að tryggja foreldrum svigrúm til sorgarúrvinnslu í kjölfar barnsmissis og eftir atvikum til að styðja við eftirlifandi systkin við að aðlagast breyttum aðstæðum. Einnig er þeim ætlað að auka líkur á að foreldrar geti átt farsæla endurkomu á vinnumarkað og geti tekið virkan þátt í samfélaginu að nýju í kjölfar barnsmissis. Lögin taka til réttinda foreldra sem hafa verið í samfelldu starfi á innlendum innumarkaði til sorgarleyfis sem og greiðslna til að koma til móts við tekjutap þeirra á því tímabili sem sorgarleyfi varir. Einnig taka lögin til réttinda foreldra utan vinnumarkaðar eða í minna en 25% starfshlutfalli og foreldra í fullu námi til sorgarstyrks. Réttur foreldris til sorgarleyfis eða sorgarstyrks er í allt að sex mánuði frá þeim tíma sem það verður fyrir barnsmissi og fellur niður 24 mánuðum síðar.

Vegna tæknilegra örðugleika frestast nóvemberútgáfa mánaðarskýrslu Vinnumálastofnunar til 13. desember.

Engar tilkynningar um hópuppsagnir bárust Vinnumálastofnun í Nóvember.

Guðmundur Ingi Guðbrandsson, félags- og vinnumarkaðsráðherra, hefur undirritað reglugerð um greiðslu desemberuppbótar til atvinnuleitenda. Óskert desemberuppbót er 94.119 krónur. Atvinnuleitendur með börn á framfæri fá jafnframt sérstaka desemberuppbót fyrir hvert barn yngra en 18 ára.

Stafræn umsókn um fæðingarorlof er nú einnig opin verðandi foreldrum sem eru í námi, eru utan vinnumarkaðar sem og þeim sem þiggja atvinnuleysisbætur.

Þjónustuskrifstofa Vinnumálastofnunar á Suðurlandi hefur opnað  að nýju og er nú staðsett á Bankavegi 10. 

Engar tilkynningar um hópuppsagnir bárust Vinnumálastofnun í október.

Ein tilkynning um hópuppsögn barst Vinnumálastofnun í september þar sem 37 starfsmönnum var sagt upp störfum í sjávarútvegi.  Uppsagnirnar koma til framkvæmda um mánaðarmótin október/nóvember 2022.