Greiðslustofa Vinnumálastofnunar á Skagaströnd flyst í nýtt og glæsilegt húsnæði
Greiðslustofa Vinnumálastofnunar hefur flust í nýtt og glæsilegt skrifstofuhúsnæði á 2. hæð að Túnbraut 1-3 á Skagaströnd en Vinnumálastofnun hefur starfrækt Greiðslustofu á Skagaströnd allt frá árinu 2007 og starfa þar nú um 20 manns.
Að beiðni Vinnumálastofnunar lét eigandi húsnæðisins, Sveitarfélagið Skagaströnd, hanna af miklum myndarbrag fullkomið og glæsilegt skrifstofurými fyrir Vinnumálastofnun sem mætir þeim kröfum sem gera verður til slíks húsnæðis nú til dags. Eftir breytinguna er allur aðbúnaður starfsfólks Greiðslustofu á Skagaströnd með því besta sem gerist.
Það var því að vonum gleðistund þegar Guðmundur Ingi Guðbrandsson, félags- og vinnumarkaðsráðherra vígði hið nýja skrifstofuhúsnæði Vinnumálastofnunar ásamt Unni Sverrisdóttur, forstjóra Vinnumálastofnunar, Jensínu Lýðsdóttur, forstöðumanni Greiðslustofu, Halldóri Gunnari Ólafssyni, oddvita sveitarstjórnar og Alexöndru Jóhannesdóttur, sveitarstjóra að viðstöddu starfsfólki Vinnumálastofnunar og sveitarstjórnarfólki á Skagaströnd.
