Mánaðarlega er framkvæmt eftirlit sem felst í því að keyrðar eru saman upplýsingar um greiðslur fæðingarstyrks við skrár skattyfirvalda.

• Foreldri getur verið heimilt að fá þann tekjumissi bættan sem greiðsla fæðingarstyrks bætir ekki og er þá miðað við að vinnuveitandi megi bæta mismun á greiðslu fæðingarstyrks og meðaltals heildarlauna síðustu 2 mánaða fyrir fæðingarmánuð barns eða þann mánuð sem barn kom inn á heimili við frumættleiðingu eða varanlegt fóstur.
• Greiðslur frá vinnuveitanda sem eru ætlaðar fyrir annað tímabil en það sem foreldri fær greiddan fæðingarstyrk koma ekki til frádráttar styrknum.

• Foreldri sem nýtur greiðslna úr Atvinnuleysistryggingasjóði samkvæmt lögum um atvinnuleysistryggingar getur ekki á sama tímabili nýtt sér rétt sinn til fæðingarstyrks, greiðslna úr Fæðingarorlofssjóði eða foreldraorlofs.
• Foreldri sem nýtur slysadagpeninga samkvæmt lögum um slysatryggingar almannatrygginga, sjúkradagpeninga samkvæmt lögum um sjúkratryggingar eða endurhæfingarlífeyris samkvæmt lögum um félagslega aðstoð getur ekki á sama tímabili nýtt sér rétt sinn til fæðingarstyrks eða greiðslna úr Fæðingarorlofssjóði. 
• Foreldri sem nýtur greiðslna samkvæmt lögum um greiðslur til foreldra langveikra eða alvarlega fatlaðra barna getur ekki á sama tímabili nýtt sér rétt sinn til fæðingarstyrks eða greiðslna úr Fæðingarorlofssjóði.
• Foreldri sem nýtur orlofslauna eða greiðslna vegna starfsloka getur ekki nýtt sér rétt sinn til fæðingarstyrks eða greiðslna úr Fæðingarorlofssjóði á sama tímabili og þær greiðslur eiga við um.
• Greiðslur frá öðrum ríkjum vegna sömu fæðingar og fyrir sama tímabil koma til frádráttar við greiðslu úr Fæðingarorlofssjóði og greiðslu fæðingarstyrks.

Hafi foreldri fengið of háar greiðslur

• Hafi foreldri fengið hærri greiðslur en því bar samkvæmt álagningu skattyfirvalda eða af öðrum ástæðum ber foreldri að endurgreiða þá fjárhæð sem ofgreidd var að viðbættu 15% álagi. Fella skal niður álagið færi foreldri rök fyrir því að því verði eigi kennt um þá annmarka er leiddu til ákvörðunar Vinnumálastofnunar.

• Mikilvægt er að foreldri tilkynni Fæðingarorlofssjóði um öll þau tilvik sem leitt geta til of hárra greiðslna, þ.m.t. ef breytingar verða á töku fæðingarstyrks eða tekjum.

• Foreldri kann að eiga inni rétt til fæðingarstyrks í kjölfar endurgreiðslu ef önnur skilyrði til þess eru uppfyllt, s.s. að réttur til fæðingarstyrks hafi ekki fallið niður vegna aldurs barns eða þess tíma frá því að barn kom inn á heimili við frumættleiðingu eða varanlegt fóstur.