Niðurfelling bótaréttar í 40 bótadaga. Segir upp starfi. Ágreiningur um laun. Staðfest.
Nr. 90 - 2005
Úrskurður
Þann 23. desember 2005 kvað úrskurðarnefnd atvinnuleysisbóta upp svohljóðandi úrskurð í máli nr. 90/2005.
Málsatvik og kæruefni
1.
Málsatvik eru þau að úthlutunarnefnd atvinnuleysisbóta nr. 1 fyrir höfuðborgarsvæðið samþykkti á fundi sínum sem haldinn var þann 25. október sl. umsókn X um atvinnuleysisbætur frá 12. október 2005. Jafnframt ákvað nefndin að réttur X til atvinnuleysisbóta skyldi falla niður í 40 bótadaga í upphafi bótatímabils með vísan til 4. tölul. 5. gr. laga nr. 12/1997, um atvinnuleysistryggingar. Ákvörðun þessi var tekin með vísan til upplýsinga á vinnuveitandavottorði frá 30. september sl. um starfslok X hjá B.
2.
X kærði ákvörðun úthlutunarnefndar til úrskurðarnefndar atvinnuleysisbóta með bréfi 27. október 2005. Í bréfinu kveðst hún hafa sagt upp vegna þess að hún hafi verið svikin um launahækkun sem hún óskaði eftir. Af þessum sökum finnist henni ekki réttlát að vera sett á bið eftir bótum. Hún hafi verið með kr. 180.000 í föst laun og beðið yfirmann sinn um launahækkun upp í kr. 200.000. Hún hafi hins vegar aldrei fengið þessa launahækkun og hafi yfirmaður hennar virst koma af fjöllum er hún hafi minnst á þetta við hann.
Í gögnum málsins liggur fyrir vinnuveitandavottorð frá B frá 4. október 2005. Þar kemur fram að X hafi starfað hjá fyrirtækinu frá 15. janúar til 30. september 2005 við afgreiðslustörf. Ástæða starfsloka er sögð sú að hún hafi sjálf sagt upp störfum. Samkvæmt bréfi til úthlutunarnefndar frá 18. október 2005 segist X hafa farið fram á launahækkun eftir fimm mánaða starf og haldið að hún hafi fengið hana. Eftir átta mánuði hafi hins vegar ekkert gerst og hafi hún þá samstundis sagt upp. Hún hafi þó ekkert haft í höndunum um þessa launahækkun.
Niðurstaða
1.
Samkvæmt 4. tölul. 5. gr. laga nr. 12/1997, um atvinnuleysistryggingar, veldur það missi bótaréttar í 40 bótadaga ef umsækjandi um atvinnuleysisbætur hefur sagt lausu því starfi sem hann hafði án gildra ástæðna. Ákvæði þetta er skýrt nánar í 7. gr. reglugerðar nr. 545/1997, um greiðslu atvinnuleysisbóta, en þar segir eftirfarandi:
Ef umsækjandi um bætur hefur sagt starfi sínu lausu er úthlutunarnefnd atvinnuleysisbóta heimilt að ákveða að hann skuli ekki missa rétt til bóta, sbr. 4. tl. 5. gr. laga um atvinnuleysistryggingar, séu starfslok tilkomin vegna einhverra eftirtalinna atvika:
a. Maki umsækjanda hafi farið til starfa í öðrum landshluta og fjölskyldan hefur af þeim sökum þurft að flytja búferlum.
b. Uppsögn má rekja til þess að umsækjandi, að öðru leyti vinnufær, hefur af heilsufarsástæðum sagt sig frá þeirri vinnu sem hann var í, að því tilskildu að vinnuveitanda hans hafi mátt vera kunnugt um þessar ástæður áður en hann lét af störfum. Heimilt er að óska eftir læknisvottorði þessu til staðfestingar.
Kjósi úthlutunarnefnd að beita heimild 4. tl. 5. gr. laga um atvinnuleysistryggingar í öðrum tilvikum en að ofan greinir, skal hún tiltaka sérstaklega í ákvörðun sinni þau atvik og sjónarmið sem ákvörðun byggist á.
2.
Kærandi kveðst hafa sagt upp starfi sínu þar sem hún hafi ekki fengið umbeðna launahækkun. Að mati úrskurðarnefndar atvinnuleysisbóta teljast þær ástæður sem kærandi gefur fyrir starfslokum sínum ekki gildar í skilningi 4. tölul. 5. gr. laga um atvinnuleysistryggingar, sbr. 7. gr. reglugerðar nr. 545/1997. Hefur ágreiningur milli starfsmanna og vinnuveitanda um launakjör, vinnutíma og/eða aðstæður á vinnustað ekki talist falla undir gildar ástæður samkvæmt framangreindum reglum.
Með vísan til framanritaðs er ákvörðun úthlutunarnefndar atvinnuleysisbóta nr. 2 fyrir höfuðborgarsvæðið um niðurfellingu bótaréttar kæranda í 40 bótadaga samkvæmt 4. tölul. 5. gr. laga um atvinnuleysistryggingar nr. 12/1997 staðfest.
Úrskurðarorð:
Staðfest er ákvörðun úthlutunarnefndar atvinnuleysisbóta nr. 2 fyrir höfuðborgarsvæðið frá 25. október 2005 um að X skuli missa rétt til atvinnuleysisbóta í 40 bótadaga í upphafi bótatímabils.
Úrskurðarnefnd atvinnuleysisbóta
Linda Björk Bentsdóttir
formaður
Elín Blöndal Arnar Þór Jónsson
Til baka
