Niðurfelling bótaréttar í 40 bótadaga. Segir upp starfi án gildrar ástæðu.
Nr. 47 - 2002
Úrskurður
Þann 28. ágúst 2006 kvað úrskurðarnefnd atvinnuleysisbóta upp svohljóðandi úrskurð í máli nr. 47/2006.
Málsatvik og kæruefni
1.
Málsatvik eru þau að úthlutunarnefnd atvinnuleysisbóta nr. 2 fyrir höfuðborgarsvæðið ákvað á fundi sínum sem haldinn var þann 23. maí 2006 að fella niður bótarétt Y í 40 bótadaga í upphafi bótatímabils vegna starfsloka hans hjá S ehf. á grundvelli 4. tölul. 5. gr. laga nr. 12/1997 um atvinnuleysistryggingar.
2.
Y kærði ákvörðun úthlutunarnefndar til úrskurðarnefndar atvinnuleysisbóta með bréfi dags. 30. maí 2006. Hann hafi sagt upp störfum hjá S ehf. í byrjun nóvember 2005. Hann hafi unnið út uppsagnarfrest sinn og hafi síðasti vinnudagur hans verið 28. febrúar. Hann hafi farið í nokkur atvinnuviðtöl og reiknaði með því að vera kominn með nýja vinnu skömmu eftir að uppsagnarfresti væri lokið. En raunin hafi verið önnur og nýtt starf hafi aðeins látið á sér standa. Ástæður uppsagnar hans hafi verið nokkrar. Ein ástæðan hafi verið dónaskapur framkvæmdastjóra fyrirtækisins í hans garð. Óreiða hafi verið í innri stjórnun fyrirtækisins sem hafi m.a. leitt til þess að hann hafi ekki lengur talið sig geta svarað viðskiptavinum af heilindum um þá þjónustu sem þeir óskuðu eftir. Mörg dæmi hafi verið um að framkvæmdastjóri hafi sagst hafa sagt hluti sem enginn kannaðist við og hann hafi svarað tölvupósti frá honum er varðaði málefni fyrirtækisins, viðskiptavina eða starfsmanna seint eða alls ekki. Skrifstofur fyrirtækisins hafi flutt í annað húsnæði. Verslunin þar sem hann var verslunarstjóri var þó áfram á gamla staðnum. Ræstingakonan hafi flutt á nýja staðinn. Þegar hann hafi rætt ræstingarmál við framkvæmdastjórann hafi hann sagt að hann gæti bara sjálfur skúrað búðina sem er vel yfir 300 fermetrar og klósettið, það yrði enginn ráðinn í það starf og það væri útrætt mál. Y vill einnig nefna að margir starfsmenn hafi sagt upp störfum þau tvö ár sem hann hafi starfað hjá fyrirtækinu.
Í gögnum málsins liggur fyrir vinnuveitendavottorð dags. 21. apríl 2006 frá S hf. Þar segir að Y hafi starfað sem verslunarstjóri hjá fyrirtækinu tímabilið 1. nóvember 2003 til 31. janúar 2006. Ástæða starfsloka er sögð sú að Y hafi sjálfur sagt upp störfum.
Niðurstaða
1.
Samkvæmt 4. tölul. 5. gr. laga nr. 12/1997, um atvinnuleysistryggingar, veldur það missi bótaréttar í 40 bótadaga ef umsækjandi um atvinnuleysisbætur hefur sagt lausu því starfi sem hann hafði án gildra ástæðna. Ákvæði þetta er skýrt nánar í 7. gr. reglugerðar nr. 545/1997, um greiðslu atvinnuleysisbóta, en þar segir eftirfarandi:
Ef umsækjandi um bætur hefur sagt starfi sínu lausu er úthlutunarnefnd atvinnuleysisbóta heimilt að ákveða að hann skuli ekki missa rétt til bóta, sbr. 4. tl. 5. gr. laga um atvinnuleysistryggingar, séu starfslok tilkomin vegna einhverra eftirtalinna atvika:
a. Maki umsækjanda hafi farið til starfa í öðrum landshluta og fjölskyldan hefur af þeim sökum þurft að flytja búferlum.
b. Uppsögn má rekja til þess að umsækjandi, að öðru leyti vinnufær, hefur af heilsufarsástæðum sagt sig frá þeirri vinnu sem hann var í, að því tilskildu að vinnuveitanda hans hafi mátt vera kunnugt um þessar ástæður áður en hann lét af störfum. Heimilt er að óska eftir læknisvottorði þessu til staðfestingar.
Kjósi úthlutunarnefnd að beita heimild 4. tl. 5. gr. laga um atvinnuleysistryggingar í öðrum tilvikum en að ofan greinir, skal hún tiltaka sérstaklega í ákvörðun sinni þau atvik og sjónarmið sem ákvörðun byggist á.
2.
Kærandi sagði upp starfi sínu sem verslunarstjóri hjá S hf. vegna þess að hann var óánægður með yfirmann sinn og innri stjórnun fyrirtækisins.
Í skilningi 4. tölul. 5. gr. laga um atvinnuleysistryggingar er orðalagið gildar ástæður skýrt þröngt sem þýðir í raun að fá tilvik falla þar undir. Ágreiningur milli starfsmanna og vinnuveitanda, s.s. um launakjör, vinnutíma og/eða aðstæður á vinnustað flokkast ekki sem gildar ástæður samkvæmt framangreindum reglum.
Að mati úrskurðarnefndar atvinnuleysisbóta teljast þær ástæður sem kærandi gefur fyrir starfslokum sínum ekki gildar í skilningi 4. tölul. 5. gr. laga um atvinnuleysistryggingar, sbr. 7. gr. reglugerðar nr. 545/1997.
Með vísan til framanritaðs er ákvörðun úthlutunarnefndar atvinnuleysisbóta nr. 2 fyrir höfuðborgarsvæðið um niðurfellingu bótaréttar kæranda í 40 bótadaga samkvæmt 4. tölul. 5. gr. laga um atvinnuleysistryggingar nr. 12/1997 staðfest.
Úrskurðarorð
Staðfest er ákvörðun úthlutunarnefndar atvinnuleysisbóta nr. 2 fyrir höfuðborgarsvæðið frá 23. maí 2006 um að Y skuli missa rétt til atvinnuleysisbóta í 40 bótadaga í upphafi bótatímabils.
Úrskurðarnefnd atvinnuleysisbóta
Linda Björk Bentsdóttir
formaður
Elín Blöndal Arnar Þór Jónsson
Til baka
