Niðurfelling á bótarétti í 40 bótadaga, hættir starfi
Nr. 3 - 2003
Úrskurður
Þann 29. janúar 2003 kvað úrskurðarnefnd atvinnuleysisbóta upp svohljóðandi úrskurð í máli nr. 3/2003.
Málsatvik og kæruefni
1.
Málsatvik eru þau að úthlutunarnefnd atvinnuleysisbóta nr. 1 fyrir höfuðborgarsvæðið ákvað á fundi sínum þann 23. september 2002, að réttur A skyldi felldur niður í 40 bótadaga skv. 4. tölul. 5. gr. laga um atvinnuleysistryggingar nr. 12/1997. Málið var aftur tekið fyrir á fundi nefndarinnar þann 30. desember 2002 þar sem fyrri úrskurður var staðfestur. Í bréfi úthlutunarnefndar til A er vísað til upplýsinga á vottorði vinnuveitanda, dags. 19. september 2002, um starfslok hennar hjá X hf..
2.
A kærði ákvörðun úthlutunarnefndar til úrskurðarnefndar atvinnuleysisbóta með bréfi dags. 2. janúar 2003. Í bréfi hennar segir að eftir að hún hafi starfað hjá X í nokkurn tíma hafi hún farið að versna af astma sem hefur hrjáð hana í mörg ár. Ástæða þess hafi verið sú að mjög kalt var á vinnustaðnum, mikill raki í lofti og hún hafi ítrekað blotnað í fætur. Læknir hennar hafi ráðlagt henni að hætta samstundis. Hún hafi ekki gert sér grein fyrir því að hún þyrfti læknisvottorð. Hún hafi tjáð vinnuveitendum sínum að hún gæti ekki starfað þar lengur vegna heilsu sinnar.
3.
Í gögnum málsins kemur fram að A starfaði hjá X h.f. tímabilið 2. til 9. september s.l. Í bréfi úthlutunarnefndar dags. 9. janúar 2003 segir að á fundi nefndarinnar þann 23. september s.l. er nefndin fjallaði um starfslok A hafi eingöngu legið fyrir vinnuveitandavottorð sem staðfesti að hún hefði sjálf sagt upp starfi sínu. Er nefndin tók málið fyrir aftur þann 30. desember s.l. lagði A fram læknisvottorð dags. 4. desember 2002. Í vottorðinu komi fram að hún sé með astma og hafi þess vegna ekki treyst sér til að vinna áfram hjá X h.f. Ekki komi fram að henni hafi verið ráðlagt að hætta störfum vegna sjúkdóms né að hún hafi leitað læknis áður en hún hætti störfum. Einnig sé A samkvæmt atvinnuumsókn hjá svæðismiðlun umsækjandi um 100% með fulla vinnufærni. Haft var samband við vinnuveitanda A, X h.f., til að fá upplýsingar um starfslok hennar. Starfsmaður í upplýsingaskráningu staðfesti að hún hefði farið heim veik einn daginn og síðan hafi ekki heyrst meira frá henni, ekkert hafi komið fram um að hún myndi hætta störfum vegna sjúkdóms eða annars.
Niðurstaða
1.
Samkvæmt 4. tölul. 5. gr. laga um atvinnuleysistryggingar nr. 12/1997, veldur það missi bótaréttar í 40 bótadaga ef umsækjandi um atvinnuleysisbætur hefur sagt lausu því starfi sem hann hafði án gildra ástæðna. Ákvæði þetta er skýrt nánar í 7. gr. reglugerð nr. 545/1997 um greiðslu atvinnuleysisbóta en þar segir: Ef umsækjandi um bætur hefur sagt starfi sínu lausu er úthlutunarnefnd atvinnuleysisbóta heimilt að ákveða að hann skuli ekki missa rétt til bóta, sbr. 4. tölul. 5. gr. laga um atvinnuleysistryggingar, séu starfslok tilkomin vegna einhverra eftirtalinna atvika:
a. Maki umsækjanda hafi farið til starfa í öðrum landshluta og fjölskyldan hefur af þeim sökum þurft að flytja búferlum.
b. Uppsögn má rekja til þess að umsækjandi, að öðru leyti vinnufær, hefur af heilsufarsástæðum sagt sig frá þeirri vinnu sem hann var í, að því tilskildu að vinnuveitanda hans hafi mátt vera kunnugt um þessar ástæður áður en hann lét af störfum. Heimilt er að óska eftir læknisvottorði þessu til staðfestingar.
Kjósi úthlutunarnefnd að beita heimild 4. tölul. 5. gr. laga um atvinnuleysistryggingar í öðrum tilvikum en að ofan greinir, skal hún tiltaka sérstaklega í ákvörðun sinni þau atvik og sjónarmið sem ákvörðun byggist á.
2.
Að mati úrskurðarnefndar atvinnuleysisbóta teljast þær ástæður sem kærandi gefur fyrir starfslokum sínum ekki gildar í skilningi 4. tölul. 5. gr. laga um atvinnuleysistryggingar, sbr. 7. gr. reglugerðar nr. 545/1997. Vinnuveitanda kæranda virðist ekki hafa verið kunnugt um ástæður þess að hún lét af störfum eins og áskilið er í b-lið 7. gr. reglugerðar nr. 545/1997. Með vísan til framanritaðs er ákvörðun úthlutunarnefndar atvinnuleysisbóta nr. 1 fyrir höfuðborgarsvæðið um niðurfellingu bótaréttar kæranda í 40 bótadaga samkvæmt 4. tölul. 5. gr. laga um atvinnuleysistryggingar nr. 12/1997 staðfest.
Úrskurðarorð:
Ákvörðun úthlutunarnefndar atvinnuleysisbóta nr. 1 fyrir höfuðborgarsvæðið frá 23. september 2002 um að A skuli missa rétt til atvinnuleysisbóta í 40 bótadaga er staðfest.
Úrskurðarnefnd atvinnuleysisbóta
Friðjón Guðröðarson
formaður
Árni Benediktsson Benedikt Davíðsson
Til baka
