Úrskurður

Hinn 19. maí 2003 kvað úr­skurð­ar­n­efnd at­vinnu­leysis­bóta upp svohljóðandi úr­skurð í máli nr. 47/2003.

Máls­at­vik og kæru­efni

1.

            Málsatvik eru þau að út­hlutunar­nefnd at­vinnu­leysis­bóta fyrir Norðurland eystra  ákvað á fundi sínum þann 1. apríl 2003, að réttur A til atvinnuleysisbóta skyldi falla niður í 40 bótadaga á grundvelli 1. mgr. 12. gr. sbr. 4. tölul. 5. gr. laga um atvinnuleysistryggingar nr. 12/1997.   Vísað var til upplýsinga frá svæðisvinnumiðlun Norðurlands eystra um að A hefði einungis mætt fyrsta daginn á námskeið samkvæmt starfsleitaráætlun og ekki gefið neinar skýringar á því.

2.

            A kærði framangreinda ákvörðun til úrskurðarnefndar atvinnuleysisbóta með bréfi dags. 7. maí 2003.  Í bréfi sínu segist hún hafa samþykkt að fara á námskeiðið.  Hún sé hins vegar búin að vera með veikt barn sem hún hafi þurft að vera mikið með hjá læknum og hafi hún sagt þeim á vinnumiðlun frá því.  Hún hafi bara mætt í einn tíma, eftir það hafi hún reynt að ná í ráðgjafann og beðið um skilaboð til hans, en aldrei náð í hann þar sem hann  hafi alltaf verið upptekinn.  Hún sé einstæð móðir með tvö börn og þurfi á þessum pening að halda.  Henni finnst óréttlátt að taka fólk út af skrá í 40 daga ef það mætir ekki í alla tíma námskeiðs. 

3.

            Í bréfi svæðisvinnumiðlunar Norðurlands eystra dags. 25. mars 2003 segir að þann 18. mars hafi A skrifað undir samning þess efnis að taka þátt í námskeiðinu Sjálfsefling sem stóð frá 26. febrúar til 18. mars s.l., alls 27 klst.  Hún hafi mætt fyrsta daginn en eftir það ekki og engar skýringar gefið á því.  Fyrir liggur í gögnum málsins samningur um námskeið nr. 3.1 dags. 18. febrúar í sjálfseflingu, skyndihjálp, samvinnu/samskiptum og heilbrigðum lífstíl.  Í samningnum er tekið fram að námskeiðið verði haldið dagana 26. febrúar til 18. mars 2003.  Námskeiðið sé alls 27 klst. og kennt sé fyrir hádegi tvo daga vikunnar.  Samningurinn er undirritaður af  A þann 18. febrúar s.l.   Í samningnum segir með breiðu letri að undirritaður staðfesti með undirskrift sinni að áætlun þessi sé gerð með hans samþykki og vilja, auk þess sem undirritaður staðfesti vilja sinn til að fylgja áætlun þessari af heiðarleika og samviskusemi .  Einnig segir að ef atvinnuleitandi fylgi ekki áætlun þessari að mati umsjónarmanns falli hún úr gildi og geti það varðað missi bótaréttar í 40 bótadaga. 

Í bréfi úthlutunarnefndar dags. 12. maí s.l. segir varðandi það atriði að A hafi ekki náð í ráðgjafa til að tilkynna forföll sín, að ráðgjafar svæðisvinnumiðlunar séu með símatíma tvisvar á dag í klukkutíma í senn.  Síðan sé alltaf hægt að ná í þá með tölvupósti.  Það hafi ekki verið vandamál fyrir atvinnuleitendur að ná til þeirra.  Hins vegar sé mikið að gera hjá þeim og þeir taka ekki síma þegar þeir eru í viðtölum.  Hafi verið lögð skilaboð til þeirra þá svara þeir þeim.  Samkvæmt upplýsingum frá ráðgjafa sem var umsjónarmaður námskeiðsins hafði A sýnt námskeiðinu mikinn áhuga og sótt það stíft að fara á það.  Áður hafði hún ákveðið að sækja námskeið í vinnuklúbbnum, en gat það ekki vegna veiks barns.  Því hafi ráðgjafinn gefið henni kost á að sækja næsta námseið þar á eftir, en þegar til kom að bjóða upp á námskeið í sjálfseflingu hafi hún frekar viljað sækja það en að fara á námskeið í vinnuklúbbnum.