Bótaréttur sjálfstætt starfandi einstaklings ákveðinn 60%. Fær heimild skattstjóra til að reikna sér lægra endurgjald en viðmiðunarreglur kveða á um. Staðfest.

Nr. 16 - 2004

Úrskurður

 

Hinn 27. febrúar 2004 kvað úr­skurð­ar­n­efnd at­vinnu­leysis­bóta upp svohljóðandi úr­skurð í máli nr. 16/2004.

 

Máls­at­vik og kæru­efni

 

1.

Málsatvik eru þau að úthlutunarnefnd Tryggingasjóðs sjálfstætt starfandi einstaklinga ákvað á fundi sínum þann 14. janúar 2004 að bótaréttur Y væri 60%.  Ákvörðun þessi var tekin á grundvelli  5. gr. reglugerðar nr. 317/2003 um Tryggingasjóð sjálfstætt starfandi einstaklinga, þar sem kveðið er á um að  sjóðfélagi, sem greiðir mánaðarlega stargreiðsluskatt af reiknuðu endurgjaldi sem er lægra en viðmiðunarfjárhæð fjármálaráðherra í viðkomandi starfsgrein, teljist vera í hlutastarfi.

 

2.

Y kærði ákvörðun út­hlutunar­nefndar til úr­skurð­ar­nefndar at­vinnu­leysis­bóta með bréfi, dags. 30. janúar 2004.  Í bréfi sínu segist hann vera sjálfstætt starfandi bílstjóri og hafa rekið eigin vörubíl.  Hann hafi verið starfandi í 100% starfi, en rauntekjur hans séu lágar.  Auk þess greiði hann kostnað af bíl sínum, hvort sem hann sé í notkun eða ekki.  Hann hafi greitt lækkandi tryggingagjald árið 2003, enda sé það í takt við minnkandi tekjumöguleika hans fyrir 100% vinnu.  Hann hafi enda lagt inn VSK númer sitt þegar ljóst var að tekjurnar dygðu ekki fyrir launum til hans og útgjöldum vegna bílsins.

 

Niður­staða

 

1.

Samkvæmt 4. laga um Tryggingasjóð sjálfstætt starfandi einstaklinga nr. 46/1997 eiga sjálfstætt starfandi sjóðfélagar, sem verða atvinnulausir, rétt á bótum úr sjóðnum samkvæmt því sem fyrir er mælt í lögunum, enda séu þeir í atvinnuleit og fullfærir til vinnu.

Samkvæmt 5. tölul. 4. gr. laga nr. 46/1997  er skilyrði að þeir hafi á síðustu tólf mánuðum áður en þeir stöðvuðu rekstur eða urðu atvinnulausir staðið mánaðarlega í skilum með greiðslu tryggingagjalds og staðgreiðsluskatts af reiknuðu endurgjaldi í a.m.k. þrjá mánuði áður en rekstur stöðvaðist, en hlutfallslega lengur hafi tekjur af rekstri verið lægri en viðmiðun reiknaðs endurgjalds í hlutaðeigandi starfsgrein samkvæmt ákvörðun ríkisskattstjóra.

Samkvæmt 4. gr. reglugerðar nr. 317/2003 um Tryggingasjóð sjálfstætt starfandi einstaklinga telst sjóðfélagi sem greiðir mánaðarlega staðgreiðsluskatt af reiknuðu endurgjaldi er nemur að lágmarki viðmiðunarfjárhæð fjármálaráðherra í viðkomandi starfsgrein vera í fullu starfi.  Samkvæmt 5. gr. reglugerðarinnar telst sjóðfélagi sem greiðir mánaðarlega staðgreiðsluskatt af reiknuðu endurgjaldi sem er lægra en viðmiðunarfjárhæð fjármálaháðherra í viðkomandi starfsgrein vera í hlutastarfi.  Starfshlutfall hans ákvarðast af hlutfalli fjárhæðar reiknaðs endurgjalds sjóðfélaga og viðmiðunarfjárhæðar. 

 

2.

Samkvæmt auglýsingu fjármálaráðherra nr. 7/2003 um reiknað endurgjald fyrir tekjuárið 2003 fellur starfsemi kæranda undir flokk E(2),  þ.e. ýmis starfsemi einyrkja ófaglærðra og vélstjórnenda s.s. bifreiðastjóra. Reiknað endurgjald við starfsemi í flokki E(2) var á árinu 2003 kr. 175.000 á mánuði.  Kærandi starfaði sem vörubifreiðastjóri og telst því til flokks E-2 og bar samkvæmt því að reikna sér kr. 175.000 í reiknað endurgjald á mánuði og kr. 10.027,50 í tryggingagjald, sem er lögbundið 5,73% hlutfall af launum.   Kærandi fékk heimild skattstjóra til að reikna sér lægra endurgjald og greiddi tryggingagjald og staðgreiðsluskatt af kr. 106.003 mánaðarlaunum allt árið 2003, þ.e. 6.074 á mánuði í tryggingagjald.  Samkvæmt útskrift frá skattstjóra er Kæarandi í skilum með tryggingagjald.  Hann reiknast samkvæmt því  í 60% starfshlutfall samkvæmt 5. gr. reglugerðar 317/2003.   Þrátt fyrir lægra reiknað endurgjald en viðmiðunarfjárhæðir fjármálaráðherra segja til um var kærandi í fullu starfi þennan tíma.   Samkvæmt upplýsingum skattstjóra hætti kærandi rekstri þann 31. desember 2003 og reiknar sér engin laun eftir það.

 

3.

. Viðmiðunartímabil bótaréttar er sem áður segir tólf mánuðir fyrir stöðvun rekstrar sbr. 5. tölul. 4. gr. laga nr. 46/1997 að teknu tilliti til 6. gr. laganna um geymdan bótarétt. Það er mat úrskurðarnefndar atvinnuleysisbóta að staðfesta beri ákvörðun úthlutunarnefndar um 60% bótahlutfall kæranda með vísan í 5. tölul. 4. gr. laga nr. 46/1997 og  5. gr. rgl. 317/2003. 

 

 

 

Úr­skurðar­orð:

 

Ákvörðun út­hlutunar­nefndar Tryggingasjóðs sjálfstætt starfandi einstaklinga frá 14. janúar 2004 um 60% bótarétt Y með vísan í 5. tölul. 4. gr. laga nr. 46/1997 og 5. gr. rgl. 317/2003, er staðfest.

 

Úr­skurð­ar­n­efnd at­vinnu­leysis­bóta

 

Linda Björk Bentsdóttir

formaður

 

Árni Benedikts­son                                            Benedikt Davíðs­son

Til baka