Niðurfelling bótaréttar í 40 bótadaga. Segir upp starfi án gildra ástæðna. Staðfest.

Nr. 23 - 2004

 

 

Úrskurður

 

Hinn 26. mars 2004 kvað úr­skurð­ar­n­efnd at­vinnu­leysis­bóta upp svohljóðandi úr­skurð í máli nr. 23/2004.

 

 

Máls­at­vik og kæru­efni

 

1.

 

Úthlutunar­nefnd at­vinnu­leysis­bóta nr. 1 fyrir höfuðborgarsvæðið samþykkti á fundi sínum þann 23. febrúar 2004 umsókn Y um atvinnuleysisbætur frá 13. febrúar 2004.  Með vísan til upplýsinga á vinnuveitandavottorði dags. 19. febrúar 2004  um starfslok hans hjá fyrirtækinu A var réttur hans til atvinnuleysisbóta hins vegar felldur niður í 40 bótadaga í upphafi bótatímabils á grundvelli 4. tölul. 5. gr. laga um at­vinnu­leysis­tryggingar nr. 12/1997, sem kveður á um það að hafi umsækjandi um atvinnuleysisbætur sagt starfi sínu lausu án gildra ástæðna, skuli það varða missi bótaréttar í 40 bótadaga.   

 

2.

 

Y kærði framangreinda ákvörðun úthlutunarnefndar til úrskurðarnefndar atvinnuleysisbóta með bréfi dags. 25. febrúar 2004.  Í bréfinu segir hann að sér hafi verið sagt upp starfi á síðasta vinnustað sínum.  Hann hafi fengið vinnu hjá B við skúringar í verslun sem þeir höfðu boðið í.  Þeir fengu hins vegar ekki verkefnið, og segir Y að það hafi alls ekki verið sér að kenna.

 

3.

 

            Í málinu liggur fyrir vinnuveitandavottorð frá B.  Þar kemur fram að Y starfaði hjá fyrirtækinu tímabilið 9. til 12. febrúar s.l. eða í alls fjóra daga.  Ástæður starfsloka eru sagðar að um tímabundna ráðningu hafi verið að ræða. Einnig liggur fyrir í málinu vinnuveitandavottorð frá fyrirtækinu A dags. 17. febrúar s.l.  Þar segir að Y hafi starfað hjá fyrirtækinu frá 2. maí 2003 til 7. febrúar 2004 er hann gekk fyrirvaralaust út.  Í bréfi úthlutunarnefndar nr. 1 fyrir höfuðborgarsvæðið dags. 27. febrúar s.l. kemur fram að á fundi úthlutunarnefndar hafi verið ákveðið að taka ekki tillit til vinnu hans hjá B þar sem hann starfaði þar aðeins í fjóra daga.  Ákvörðunin um niðurfellingu bótaréttar hans í 40 bótadaga var tekin á grundvelli starfsloka hana hjá A þar sem hann gekk fyrirvaralaust úr starfi.

 

Niður­staða

 

1.

 

Sam­kvæmt 4. tölul. 5. gr. laga um at­vinnu­leysis­tryggingar nr. 12/1997, veldur það missi bóta­réttar í 40 bóta­daga ef um­sækjandi um at­vinnu­leysis­bætur hefur sagt lausu því starfi sem hann hafði án gildra ástæðna.  Ákvæði þetta er skýrt nánar í 7. gr. reglu­gerð nr. 545/1997 um greiðslu at­vinnu­leysis­bóta en þar segir:  Ef um­sækjandi um bætur hefur sagt starfi sínu lausu er út­hlutunar­nefnd at­vinnu­leysis­bóta heimilt að ákveða að hann skuli ekki missa rétt til bóta, sbr. 4. tölul. 5. gr. laga um at­vinnu­leysis­tryggingar, séu starfs­lok til­komin vegna einhverra eftir­talinna at­vika:

a.         Maki um­sækjanda hafi farið til starfa í öðrum lands­hluta og fjöl­skyldan hefur af þeim sökum þurft að flytja bú­ferlum.

b.         Upp­sögn má rekja til þess að um­sækjandi, að öðru leyti vinnu­fær, hefur af heilsu­fars­á­st­æðum sagt sig frá þeirri vinnu sem hann var í, að því til­skildu að vinnu­veitanda hans hafi mátt vera kunnugt um þessar ást­æður áður en hann lét af störfum. Heimilt er að óska eftir læknis­vott­orði þessu til stað­festingar.

Kjósi út­hlutunar­nefnd að beita heimild 4. tölul. 5. gr. laga um at­vinnu­leysis­tryggingar í öðrum til­vikum en að ofan greinir, skal hún til­taka sér­stak­lega í ákvörðun sinni þau at­vik og sjónar­mið sem ákvörðun byggist á.

 

2.

 

Að sögn kæranda hætti hann vegna ósættis við vinnuveitendur sína.  Ágreiningur milli starfsmanna og vinnuveitanda um launakjör, vinnutíma og/eða aðstæður á vinnustað flokkast almennt ekki sem gildar ástæður í skilningi  4. tölul. 5. gr. laga um atvinnuleysistryggingar, sbr. 7. gr. reglugerðar nr. 545/1997.samkvæmt framangreindum reglum.  Kærandi gekk fyrirvaralaust úr starfi hjá fyrirtækinu A þar sem hann hafði starfað í níu mánuði.  Honum var ekki sagt upp störfum heldur sagði hann sjálfur upp fyrirvaralaust.  Að mati úrskurðarnefndar atvinnuleysisbóta teljast starfslok með þessum hætti ekki gildar ástæður í skilningi 4. tölul. 5. gr. laga um atvinnuleysistryggingar sbr. 7. gr. reglugerðar nr. 545/1997.  Með vísan til framanritaðs er ákvörðun úthlutunarnefndar atvinnuleysis­bóta nr. 1 á höfuðborgarsvæðinu um niðurfellingu bóta­réttar kæranda í 40 bóta­daga samkvæmt 4. tölul. 5. gr. laga um atvinnuleysistryggingar nr. 12/1997 staðfest.

 

Úr­skurðar­orð:

 

Ákvörðun út­hlutunar­nefndar at­vinnu­leysis­bóta nr. 1 á höfuðborgarsvæðinu frá 23. febrúar 2004 um niðurfellingu bótaréttar Y í 40 bótadaga skv. 4. tölul. 5. gr. laga nr. 12/1997 um atvinnuleysisbætur, er staðfest.

 

Úr­skurð­ar­n­efnd at­vinnu­leysis­bóta

 

Linda Björk Bentsdóttir

for­maður

 

Árni Benedikts­son                                Benedikt Davíðs­son

 

 

 

Til baka