Fæðingarorlofssjóður hefur lokið endurútreikningi greiðslna til foreldra sem voru í fæðingarorlofi eða sorgarleyfi í apríl, maí og júní 2024 og áttu rétt á hærri greiðslum til samræmis við hækkun á hámarksgreiðslum úr 600.000 kr. í 700.000 kr. á mánuði, sbr. breytingar á lögum um fæðingar- og foreldraorlof og lögum um sorgarleyfi sem giltu afturvirkt frá 1. apríl sl.
Alþingi hefur samþykkt breytingu á lögum um fæðingar- og foreldraorlof og sorgarleyfi. Breytingarnar fela í sér að hámarksgreiðslur verða hækkaðar í þremur skrefum úr 600.000 kr. á mánuði í 900.000 kr. á mánuði.
Vinnumálastofnun hefur gefið út ársskýrslu Fæðingarorlofssjóðs vegna nýtingu réttinda fyrir árið 2023. Er þetta í þriðja skiptið sem skýrslan er unnin samkvæmt lögum um fæðingar- og foreldraorlof nr. 144/2020. Við gerð skýrslunnar naut stofnunin aðstoðar Ph.D. Ásdísar Aðalbjargar Arnalds, forstöðumanns við Félagsvísindastofnun Háskóla Íslands.
Þann 28. febrúar sl. féll dómur í Hæstarétti í máli nr. 24/2023 þar sem álitaefnið sneri að því hvort lög um fæðingar- og foreldraorlof brytu í bága við skuldbindingu samkvæmt EES-samningnum. Í málinu sem stefnandi höfðaði gegn íslenska ríkinu var þess krafist að felldur yrði úr gildi úrskurður úrskurðarnefndar velferðarmála sem staðfesti niðurstöðu Fæðingarorlofssjóðs um útreikning greiðslna í fæðingarorlofi. Stefnandi hafði verið búsett og starfandi í öðru EES-ríki á tólf mánaða viðmiðunartímabili sem lauk sex mánuðum fyrir fæðingarmánuð barns. Þar sem hún hafði ekki aflað tekna á innlendum vinnumarkaði á viðmiðunartímabilinu fékk hún greiddar lágmarksgreiðslur í samræmi við lög um fæðingar- og foreldraorlof. Hæstiréttur komst að þeirri niðurstöðu að Fæðingarorlofssjóður hefði ekki getað virt að vettugi skýr og afdráttarlaus fyrirmæli laga um fæðingar- og foreldraorlof við ákvörðun um útreikning greiðslna úr sjóðnum. Þau málsatvik sem voru til umfjöllunar í dómnum áttu sér stað í tíð eldri laga um fæðingar- og foreldraorlof nr. 95/2000. Í núgildandi lögum nr. 144/2020 eru þau ákvæði sem á reyndi í málinu óbreytt. Hefur dómurinn því fordæmisgildi þegar kemur að útreikningi greiðslna til foreldra sem hafa ekki starfað á innlendum vinnumarkaði á viðmiðunartímabili.
Guðmundur Ingi Guðbrandsson félagsmála- og vinnumarkaðsráðherra hefur undirritað reglugerð um breytingar á fjárhæðum greiðslna í sorgarleyfi og greiðslu sorgarstyrks á árinu 2024.
Guðmundur Ingi Guðbrandsson félagsmála- og vinnumarkaðsráðherra hefur undirritað reglugerð um breytingar á fjárhæðum greiðslna úr Fæðingarorlofssjóði og fjárhæðum fæðingarstyrks til foreldra barna sem fæðast, eru ættleidd eða tekin í varanlegt fóstur á árinu 2024.
